Uman nga maka-angkon it kahigayunan ro mga Pinoy fans nga makit-ang nagahampang ro national women’s football team antes maghampang sa mabahoe nga torneyo sa Women’s World Cup sa masunod nga dag-on.
Matapos nga magkampeon sa Asean Football Federation ku nagtaliwan nga Dominggo, insigidas nga nagpahaum ro Philippine Football Federation it four-nation tournament nga pagahiwaton sa nasyon bilang kaparte it grabe nga preparasyon para sa World Cup nga pagahiwaton sa Australia ag New Zealand.
Suno kay PFF President Mariano “Nonong” Araneta nagapatigayon eon sanda sa makaron it diskusyon para sa pagahimuon nga pocket tournament.
Ro four-nation event hay posibleng isapatigayon sa Philippine Sports Stadium sa Bocaue, Bulacan ukon sa New Clark City Stadium sa Capas, Tarlac.
Kung siin ro nasambit sigon nga mga venue hay himu sa natural grass nga pagagamiton man sa FIFA World Cup.
Samtang,nakahathat eon man ro puspusan nga ensayo it Filipinas pamaagi sa pagpartisipar man sa nabilin nga FIFA international match calendars nga igapatigayon sa buean it Agosto, Setyembre, Oktubre ag Nobyembre.
