KALIBO, Aklan–Sa pihak nga nauli sa pagkapierde ro unang pagsabak it Philippine women’s football team sa makasaysayang kampanya kara sa World Cup, maabu sa gihapon ro sumaludo kanda.
Suno kay David Abella, sangka football enthusiast nga nakita ro pagtinguha it Filipinas nga makipagsabayan sa team it Switzerland nga nagresulta sa score nga 2-0 nga ginpatigayon sa Forsyth Barr Stadium sa Dunedin, New Zealand.
Dugang pa nga haeos tanan sanda nga mga football fans ag veteran football journalists nga nagtan-aw sa live viewing nga gin organisa it Ph football federation sa sangka venue sa manila hay nagtangis ag nagpaeanindog ro baeahibo sa sobrang pagka-proud matapos nga mabatian ro pagtukar it national anthem it nasyon antes ro pag umpisa it hampang.
Samtang, bangud sa kapierdehan hay nabutang sa 46th-ranked ro Filipinas.
Gindugang pa ni Abella nga maskin nga mabahoe nga underdog, gin-umpisahan it mga Pinay nga may kabaskog ro hampang kun sa siin haeos ginkoebaan ro may mas mataas nga ranggo nga Switzerland sa ika-16 nga minuto.
Ginpatiyog ni Filipinas forward Katrina Guillou ro Swiss goalie nga si Gaëlle Thalmann ag nakita ro likod it net, apang sa owa it swerte, ro anang attempt hay na-flag offside it assistant referee.
Panawagan ni Abella nga padayun nga suportahan ro team Filipinas nga makabangon kontra sa New Zealand sa Martes, Hulyo 25, 1:30pm oras sa Pilipinas nga pagahiwaton sa Wellington Regional Stadium sa Wellington, New Zealand ag sa Hulyo 30 kontra sa Norway.
