Nakaalerto ag bantay sarado makaron it Macau government sa China ro Filipino community sa nasambit nga rehiyon.
Raya hay matapos nga makalista it maabong kaso it tinamaan it covid-19 sa komunidad it mga Pinoy.
May kaangtanan kara, ginpahayag ni Bombo International Correspondent Emily Delos Santos nga haeos adlaw-adlaw hay ginapaidaeom sanda sa swab test bangud nga gindudahan it health authority nga sa Pinoy naghalin ro infection.
Bangud kara, mas eabi pa gid nga naging limitado ro andang hueag apang napamatud-an man ko ulihi nga bukon eamang it sa Pinoy community ro may maabong kaso it mga tinamaan it virus kundi maging sa mga residente it ibang banwa ag syudad.
Madumduman nga naghaeoga ro restriction sa nasambit nga rehiyon bangud nga nag-zero case sanda sa pandemya apang gulpi eamang nga nagtaas it uman ro andang kaso it covid matapos nga ginbuksan sa mga turista maghalin sa ibang nasyon ag rehiyon ro andang border.
