KALIBO, Aklan—Nagapati ro Filipino community sa Jakarta, Indonesia nga manami nga oportunidad para sa nasambit nga nasyon ro pagpungko nanda makaron nga dag-on bilang chairman it 42nd Association of Southeast Asian Nations (ASEAN) Summit agud nga mas pang mapabaskog ag ma-promote ro industriya it turismo.
Raya ro ginpahayag ni Bombo International Correspondent Elaine Mercado it Jakarta, Indonesia.
Suno kana nga posibleng nakita ni Indonesia president Joko Widodo nga kahigayunan ro event agud nga ma-revive ro ekonomiya it andang nasyon nga eubus nga naapektuhan it pandemya pinaagi sa tourism sector.
Opisyal nga nag-umpisa ro ASEAN Summit sa Labuan Bajo, Indonesia ko Mayo 9 ag nagtapos Mayo 11, 2023.
Ro nasambit nga venue suno hay haeos daywang oras ro biyahe by air halin sa Jakarta ag makabig nga mataas ro tourism potential rason nga gustong i-promote it Indonesia.
Maabu sigon sa lugar nga mga manami nga beaches, sceneries, mga local crafts kapareho it batik ag iba pa.
Samtang, ginkalipay man it mga Pinoy ro pagtalakay it ASEAN Leaders sa mga isyung may kaangtanan sa pagpabilin it internal peace sa Southeast Asia sa tunga it nagabangon nga geopolitical issues sa Indo-Pacific Region samtang ginapabaskog ro regional bloc para maging fast-growing, inclusive ag sustainable economic region.
Sa pihak nga parte, bangud sa pagiging masako it tanan, gindesisyunan it Filipino community sa Jakarta nga pagahiwaton ro andang Pinoy Fiesta gathering sa Mayo 28 imbes sa Hunyo 12 bilang pagdumdum sa independence day.
