KALIBO, Aklan–Ginapadahan it Philippine Consulate General sa New York ro Filipino community eabi eon ro mga kababayin-an nga senior citizens bangud sa uman nga pagtuhaw it insidente it ‘hate crimes’ kontra sa mga Asyano.
Suno kay Bombo International Correspondent Greg Aguilar it Califiornia, USA nga maka-alarma ro pagtuhaw eon man it pag-atake sa mga Asian Americans ko nagtaliwan nga mga inadlaw.
Ro padumdum hay kasunod it napabalitang pag-atake sa daywang Pilipinong babaye nga puro magueang eon.
Ginalaygay it konsulado eabi eon sa mga kababayin-an nga indi magpanaw nga naga-isaeahanon , likawan ro mga peligrosong lugar.
Gindugang pa ni Aguilar nga umpisa nga magtuhaw ro covid 19 pandemic hay nagtaas it haeos onse beses nga nagtaas ro pag-atake sa mga Asian americans sa US.
Sa pihak nga parte, ginakilaea man sigon it konsulada ro madasig nga aksyon it lokal nga gobyerno sa Amerika partikular ro ginpirmahan nga laye ni US president joe biden nga hate crimes act.
Natukiban nga kaeabanan sa mga attackers hay mga palaboy ukon owa it kaugalingon nga baeay, eakot sa iligal nga droga ag may sakit sa paminsaron.
