KALIBO, Aklan–Suportado it Filipino community sa US ro kampanya ni Rabiya Mateo sa 69th Miss Universe 2021.
Suno kay Bombo International Correspondent Pinoy Gonzales it Houston, Texas nga todo-bantay ro mga Filipino bukon eamang sa estados unidos kundi sa bilog ga kalibutan sa anang pagsabak sa preliminary competition.
Sa pihak nga may pilang nag-bash halin sa mga kaparehong Pinoy, apang maabu ro nagdayaw sa naging performance ni Rabiya sa National Costume Competition, kun sa siin, ginpakita ro anang outfit nga Philippine flag-inspired.
Nasayuran nga ro anang ginsuksok nga national costume hay gin obra it Filipino designer nga si Rocky Gathercole, apang bangud sa annag pagkamatay, si Manny Halasan ro nagkompleto kara kaibahan ro headpiece ag ibang accessory para sa costume.
Ginpahayag ni Gonzales nga owa man nagpa-ulihi si Rabiya sa iba pang nga kandidata maskin nga owa nag-igo sa anang ueo ro headpiece ag masyadong mabug-at ro anang pakpak nga nagatimbang it haeos tunga sa sako nga bugas.
Sa kamatuoran hay nakabo-oe sigon raya it 9.54 points sa nasambit nga kompetisyon ukon pang-no.10 sa pangkabilugan.
Samtang, gin-describe ni Gonzales ro pambato it Pilipinas sa swimsuit portion nga preparado ro anang eawas.
Haeos tanan sigon nga viewers hay napa-wow sa anang pagrampa sa runway suksok ro yellow two-piece bikini.
Makabig man sigon nga blooming ag attractive si Rabiya sa anang kulay dueaw man nga gown sa evening gown competition.
Sa pihak nga parte, mabahoe sigon ro chansa ni Rabiya nga mabooe ro ika-limang korona it Miss Universe matapos nga sambilog raya sa mga crowd favority.
Bukon eamang sigon sa Pilipinas raya masangag kundi sa iba man nga nasyon bangud nga makabig imaw nga palaban.
Ro tinguhaan eon lang sigon makaron ni Rabiya nga magpangibabaw sa question and answer portion.
Apang kumpiyansa sigon ro kaabuan sa anang kaaeam bangud sa anang pagiging cum laude sa pagtapos sa kolehiyo.
Ro coronation night hay sa Lunes nga adlaw sa Seminole Hard Rock Hotel & Casino sa Hollywood, Florida, USA.
