KALIBO, Aklan — Grabe ro pagkakibot ag pagpangasubo it Filipino community sa Canada matapos ro insidente it pag-arado it sangka saeakyan sa Vancouver Street festival nga nagresulta sa pagkamatay it 11 nga katawo ag maabu nga iba pa ro naninahan.
Sa interview it Bombo Radyo Kalibo, ginpahayag ni Lorger Pronton Geronimo, Bombo International News Correspondent sa Montreal, Canada nga ro natabu sa Lapu-Lapu Day sa Vancouver hay makabig nga makasueubo.
Maskin nga ro insidente hay natabu sa Vancouver, batyag it Filipino community sa bilog nga Canada ro epekto kara.
Ginapaabot sigon nanda ro andang pangamuyo ag pakikisimpatiya.
Ro Lapu-Lapu Day festival hay sangka selebrasyon it pagpakita it kultura ag kapag-on it mga Pinoy nga ginsunod sa pangaean ni Lapu-lapu, sangka katutubong lider nga nagsukoe sa kolonyalismong Espanyol.
Nasayuran nga ginkasuhan eon it British Columbia Prosecution Service ro suspek nga si Kai-Ji Adam, 30 anyos, residente it Vancouver it 8 counts it second degree murder ag posibleng madugangan pa ro anang ginapangatubang nga kaso.
Nag-atubang ro suspek sa korte ag nagapabilin nga sa kustodiya it local authorities.
Nauna eon nga ginduea it mga imbestigador ro posibilidad it terorismo sa mamakangieidlis nga trahediya.
