Kalibo Aklan ————-Kumpiyansa ro Filipino community sa Israel nga maiuli it pambato it Pilipinas nga si Beatrice Luigi Gomez ro korona sa Miss Universe 2021 pageant nga pagahiwaton sa Eilat, Israel sa Disyembre 12.
Suno kay Bombo International Correspondent Melly Jean Novilla , tubong Barangay Guadalupe, Libacao ag presenteng naga-istar sa El Aviv, Israel nga bilog ro suporta it mga Pilipino kana.
Pila suno kana sa mga Pinoy idtu hay nagaplano nga magtan-aw maskin nga medyu maeayo ro venue ag maabu nga mga requirements nga kinahangean nga ma-comply.
Haeos nag-aeabutan eon man sigon ro masobra sa 80 nga kandidata halin sa nagkaeain-eain nga nasyon ag nagpaidaeum sa quarantine procedure.
Sangka kandidata man suno kana nga halin sa France ro nagpositibo sa covid-19.
Sa makaron hay owa pa it mga ginapatigayon nga preliminary events.
Samtang, excited man ro mga Pinoy sa Israel bangud nga sambilog sa mga magiging judge it pageant hay ro aktres nga si Marian Rivera .
Uman nga magabalik bilang host ro kontrobersiyal nga si Steve Harvey.
Ginsaysay pa ni Novilla nga ro Eilat hay sangka tourist destination sa Israel nga kapareho man sa isla it Boracay, kun sa siin haeos an-um nga oras ro biyahe halin sa capital nga Tel Aviv .
Si Gomez nga mag-eowas nga may mga tattoo sa eawas hay makabig man nga openly gay ag tumandok it Cebu City.
Sa pihak nga parte, sa atubang it paeag it bag-ong variant nga Omicron, temporaryong ginsarado ro mga borders it Israel sa tanan nga mga turista sa sueod it daywang domingo .
Required man nga magpakita it green pass ro mga pumueuyu kon nagasueod sa mga enclosed establishments kapareho it mga malls , sinehan ag iba pa nga nagapakita nga ro sangka indibidwal hay fully vaccinated .
