KALIBO, Aklan—Nagapati ro Filipino community sa Israel nga owa it matabu nga repatriation sa pihak it naga-grabeng kinagamo sa Israel ag Palestine ko nagtaliwan nga mga inadlaw.
Suno kay Winston Santos, founder ag managing director it national alliance of Filipino community sa Israel nga sa sueod it haeos 20 anyos nana nga pagpabilin sa nasambit nga nasyon hay makapilang beses eon imaw nga naka-experiensiya it airstrike it Israel samtang nagapaeupok man ro Palestinian militant groups it rocket, rason nga medyu nasanay eon sanda sa makarondaya nga hitabu.
Apang mas tensyunado sigon makaron nga kahigayunan bangud nga naging sunod-sunod ro rocket attack.
Ginatantiya it Philippine Embassy sa Israel nga kapin sa 31,000 nga Filipino ro legal nga nagatrabaho ag naga istar sa mga mabahoe nga siyudad it nasyon kapareho it Tel Aviv, Jerusalem ag Haifa kun sa siin kaabuan kara hay mga caregivers.
Mag-eowas kara, ro kada apartment building suno kana hay may ginatawag nga communal bomb shelter nga ginadaeaganan ukon ginapanaguan it mga residente sa oras nga makabati it sirena nga patimaan nga may nagapaabot nga rocket it militanteng Hamas.
May una man nga Iron Dome system ro Israel nga naga-intercept sa mga nagapaabot nga rockets, kun sa siin sa kahawaan eon raya nagasabog.
Kaabuan sigon sa mga pinoy hay kabisado eon ro mga bomb shelter ag alerto sa sueod man it building ukon sa karsada ag maskin nakasakay sa bus.
Sa haeos owa it pundo nga pagbaeayluhan it rocket attack it magtimbang nga pwersa, owa pa it napabalitang Filipino nga nadaeahig, naninahan ukon naapektuhan it insidente.
Posible suno kana nga magapatunga ro international community agud nga makaangkon it ceasefire ag malikawan ro ginatawag nga full scale war.
