KALIBO, Aklan—Ginpabugae it Filipino community sa Japan ro panibag-ong kadaeag-an it atletang si Hidilyn Diaz.
Suno kay Bombo International Correspondent Gemma Hormillosa Gelloagan sa Tokyo, Japan nga haeos mapa-euha sanda kat gin-anunsyo ag ginpatukar ro Philippine anthem matapos nga maangkon ni Diaz ro kauna-unahang bueawan nga medalya it Piliipinas sa Tokyo 2020 Olympics makataliwan ro haeos 97 anyos.
Nagdaog si Diaz sa women’s 55 kilogram category sa weightlifting.
Sa kabilugan nga 224 kilogram, 97 kara hay sa snatch samtang ro 127 man ro para sa cleant & jerk.
Suno kay Gelloagan nga sangka inspirasyon si Hidilyn sa bilog nga pumueuyong Filipino.
Samtang, nagakanugon man ro kaabuan sa mga Pinoy sa Japan nga owa nakita it ‘live’ ro mga hampang it Filipino athletes sa pihak nga nakapa-reserve eon sanda it ticket ko nagtaliwan nga dag-on bangud sa padayon nga paeag it covid 19 pandemic.
Mag-eowas kay Hidilyn , mabahoe man ro pagpati ni Gelloagan nga makakuhit man it medalya ro pinay boxer nga si Irish magno.
