KALIBO, Aklan—Nagapangasubo ro haeos tanan nga mga pumueuyu sa united kingdom sa pagtaliwan sa pihak nga kinabuhi it asawa ni Queen Elizabeth II nga si Prince Philip sa edad nga 99.
Suno kay Bombo International Correspondent Merds Vidal it London, UK ag tumandok it Brgy. Bulwang, Numancia nga kaabuan sa mga tawo hay nag-agto sa karsadahon agud nga pasidunggan ro sambilog sa mga sikat nga miyembro it British Royal Family ag Royal Highness Prince Philip Duke of Edinburgh sa pagserbisyo kara sa sueod it haeos pitong dekada.
Ginpahayag dugang nga eubus nga nasubuan ro mga tawo bangud nga matsa naduea-an sanda it ‘father figure’.
Nakilaea sigon si Prince Philip sa anang reputasyong maisog, owa it paliguy-ligoy ag mahilig maghingae eabi eon sa mga inunga.
Samtang, sa pihak sigon it paeag it Coronavirus Disease 2019 ukon COVID-19, owa napugngan ro mga tawo nga mag-agto sa guwa it Buckingham Palace, ro opisyal nga baeay it reyna agud nga personal nga makita ro official notice nga nakabutang sa gate.
Apang ko ulihi, gindesisyunan nga boe-on lang agud nga malikawan ro pagtumpok it mga tawo ag indi maeabag ro social distancing.
Nag-aywan man ro mga tawo it bueak sa gate ag ro bandera hay ginbutang sa half-staff.
Temporaryo man nga ginpundo it mga television ag radio station ro andang programming agud nga ipabati ro andang national anthem, ro “God Save the Queen”.
Sa makaron hay temporaryo anay nga ginpapundo it gobyerno ro paghaead it mga bueak ag pagtipon-tipon it mga tawo sa guwa it gate it royal residences sa bilog nga UK agud nga maprotektahan ro ikamayad nga eawas it publiko.
Si Prince Philip hay namatay samtang sa Windsor Castle.
Ko nagtaliwan nga March 16, nagguwa imaw sa ospital nga matsa maeuya ag maeupsi matapos nga ma-confine bangud sa heart problem ag owa ginbulgar nga infection.
Si Prince Philip hay ginkasae kay Queen Elizabeth ko 1947 ag mabahoe ro anang naging papel sa pag-modernize it monarkiya ko post-World War II period.
Maabu man ro nagakanugon bangud nga magiging centenarian eon kunta raya ukon magaselebrar it ika-syen anyos nga kaadlawan sa buean it Hunyo, kun sa siin ginahandum raya it tanan agud nga makabaton it birthday card halin kay Queen Elizabeth.
