KALIBO, Aklan—Gina-abangan eon it haeos bilog nga Pilipinas ro magiging hampang it mga Filipina golfers nga sanday Bianca Pagdanganan ag Yuka Saso sa finals it women’s individual golf competition sa nagapadayun nga 2020 Tokyo Olympics.
Suno kay Bombo Samurai Correspondent Josel Palma nga kahapon, Agosto 6 natapos eon ro ikatlong round it hampang kun siin si Saso hay nag-pwesto sa pang-20 samtang si Pagdanganan hay una man sa pang-29 nga pwesto./
Suno kay Palma ro round 4 it hampang hay pagahiwaton it sang oras nga mas temprano sa orihinal kara nga schedule makaron nga adlaw sa Kasumigaseki Country club bangud sa ginaeauman nga pagbubu it uean.
Engkaso suno kana nga mapundo ro hampang sa katung-anan it kompetisyon tuga it eain it panyempo, ro score sa round 3 ro paga-basehan it pagtao it medalya.
Nagapanguna sa makaron ro American golfer nga si Nelly Korda kun siin ginasundan man raya it pambato it India ag New Zealand.
