KALIBO, Aklan—Napas-eawan ro Filipino gymnast nga si Carlos Yulo nga maka-secure it medalya sa men’s vault final sa nagapadayun nga 2020 Tokyo Olympics.
Si Yulo hay nagtapos sa pang ap-at nga pwesto sa score nga 14.716.
Ginkabig man nga kampeon si Jeahwan Shin it South Korea nga may 14.783 samtang ro silver medal hay naadto man kay Denis Abliazin it Russia ag ro bronze medal hay nakuhit ni Artur Davtyan it Armenia nga may score nga 14.733.
Suno kay Bombo Samurai Correspondent Josel Palma nga ro second vault ni Caloy nga 14.866 hay ro highest sa bilog nga event, apang ro una nana nga pagsalang nga nagkasaea imaw sa landing ro humatak sa floor exercises world champion rason nga nagnaba ro score.
Samtang, maabo man nga mga pumueoyo ro nagpaabot it pagtamyaw kay Yulo nga nakipagsambuwa it husto sa mga world class athletes.
Maging ro Tokyo Olympic official Twitter account hay gindayaw man si Yulo eabi eon ag masyado pa raya nga bata sa edad nga 21-anyos.
Nauna eon nga ginkabig si Yulo bilang unang Southeast Asian World Champion Male Gymnast ko 2019 ag sa kaparehong dag-on naging SEA Games most bemedaled Philippine athlete man imaw matapos nga makabuoe it daywang gold ag limang silver medal.
Si Yulo hay nagtraining sa Japan halin ko dag-on 2016.
Samtang sa pihak nga parte, ginpasiguro kara nga magabawi imaw sa Paris Olympics 2024.
Mabahoe sigon ro expectations kay Yulo bangud sa anang kadaeag-an sa mga world championships competitions ag sa Southeast Asian Games ko 2019.
Maskin nga una sa pang ap-at nga puwesto si Yulo hay bilog gihapon ro suporta nga ginpakita it mga Pilipinong nagtan-aw sa hampang.
