Eubus ro kasadya it sangka football analyst matapos nga nagdaog ro anang ginsuportahan nga koponan sa FIFA World Cup 2022 nga ginpatigayon sa Qatar.
Suno kay Zaph Castillo, raya eon ro pinakamanami nga hampang sa tanan nga edition it world cup.
Ginpahayag nga uwa gid nagta-o it tyansa ro Argentina pinaagi kay Leonil Messi nga maunahan sanda it France pinaagi man sa star player it powerhouse team nga si Kylian Mbappe.
Apang, uwa man nagpapyerde ro France ag gilayon nga ginpatas ro puntos pag-abot sa second half it hampang.
Naging makahawat-hawat ro kabilugan nga final match bukon eamang it para sa mga fans it daywang koponan kundi maging sa andang mga coaches ag staff bangud nga pareho ro mga raya nga nagahingabot nga maangkon ro golden trophy.
Apang sa kaulihanan hay uwa gid nabueo it France ro handom nga back to back win ag ginkilaea nga kampeon ro Argentina kon sa siin raya eon ro andang ikatlong titueo ag uman nga nakuhit makataliwan ro ika-36 anyos halin kat ulihi nanda nga gindominar ro tournament.
