Kasunod it pag-umpisa it buean it Marso hay ro pagselebrar it Fire Prevention Month.
Raya hay ginapatigayon it mga katapo it Bureau of Fire Protection ukon BFP agud maipaabot sa mga pomoeuyo ro mga dapat himuon para makalikaw sa sunog.
Bangud kara, insakto alas-12:00 kahapon hay nagapatigayon ro mga fire stations sa bilog nga nasyon it limang minutong pagpatunog it andang fire alarms.
Tuyo it aktibidad nga ipakita sa publiko nga haum ro tanan nga fire deparments para magtao it ayuda sa tyempo it sunog sa bulig it mga BFP personnel, non-government organizations ag iba pang public servants.
May kaangtanan kara, ginpasiguro ni SFO1 Felinor Suco it BFP- Aklan nga mas pa nandang pabaskugon ro ginahimo nga fire safety awareness campaign sa bilog nga buean it Marso.
Nagpahanumdom man raya sa tanan nga likawan ro paggamit it cellphone samtang naga-eaha it pagkaon ag bantayan it mayad ro gina-ubra bangud raya ro masami nga ginahalinan it sunog.
Mas mayad man sigon nga kung magbakasyon ro tanan nga myembro it pamilya hay siguraduhon gid nga nakapatay ro main switch.
Ginpahayag dugang nga kung magsindi it kandila hay ibutang raya sa pinggan agud kung matumba hay indi eun mag-eapta pa ro kaeayo.
Samtang sa pihak nga parte, importante man sigon nga accessible ro tanan nga exit it mga edipisyo agud mapadali ro pagguwa it tanan kung may sunog.
Suno kay F02 Alvin Patricio, sambilog gid sa andang ginapahanumdom permi nga dapat usuyon gid ro exit kung naka-stock sa lugar nga nagakasunog.
Mas mayad suno pa kana nga magkamang ro sangka individwal ag magpaeapit sa dingding hasta nga makaabot sa guwa.
Dugang pa kara, bukon it euwas nga magpabilin sa Comfort Room ukon CR sa tyempo it sunog maski pa nga maabo karang nakatipon nga tubi.
