KALIBO, Aklan—Batyag makaron it mga nagabaligya it paeupok sa Aklan ro epekto it pandemya nga daea it Coronavirus Disease 2019 ukon covid 19 kamana man ro pahayag it gobyerno nga eubusan eon nga ibawae ro paeupok sa masunod nga dag-on 2021.
Suno sa tinderang si Rosaly Cuarton sa may barangay Tabayon, Banga limitado ro andang ginbo-oe nga stock it paiwag ag mga paeupok bangud sa mahina nga pagbaligya.
Problema man sigon nanda umpisa nga maghathat it mga baligya sa andang gintukod nga stall umpisa ko disyembre 24 ro pirmeng pag-uean.
Maabu suno kana ro owa nagakabakae makaron kumpara ko nagtaliwan nga mga dinag-on bangud sa posibilidad nga nagatipid ro mga tawo.
Apang sa pihak kara nagaeaum sigon ro mga negosyante kapareho ni Rosaly nga magabaskog pa ro andang kita samtang nga nagahilapit ro bisperas it Bag-ong Dag-on.
Nasayuran nga 12 pesos ro pinakamanaba nga presyo sa mga ginabaligya kara nga paeupok kapareho it kwitis ag 2,000 pesos ro pinakamabahe nga paiwag.
Pila pa sa mga madahog nga paeupok hay ro whistle bomb ag bawang nga tig-12 pesos man kada sambilog; 5-star, 20 pesos ; lucis nga pang-unga, 80 pesos kada sang dosena ukon waeong peso kada sambilog; lucis 5-colors, 250 pesos kada sang dosena ukon 25 pesos kada sambilog; sawa nga 1,000 rounds hay nagabalor it 1,300 pesos; paha ni hudas hay 1,400 pesos sa 1,000 rounds; fountain nga mabahoe 150 pesos sang minuto hasta daywang minutos.
