KALIBO, Aklan—Balik-operasyon eon ro fish, meat ag vegetable section it Tangalan public market matapos ro daywang adlaw nga lockdown agud nga mataw-an it daean ro maidid nga disinfection ag contact tracing.
Raya hay matapos nga makalista it an-om ka mga market vendor nga positibo sa Coronavirus Disease 2019 ukon COVID-19.
Suno kay Tangalan Vice Mayor Gene Fuentes nga umpisa ko adlaw it Sabado, Hunyo 26 uman eon nga ginbuksan ro nasambit nga section it tindahan sa publiko.
Naging epektibo suno kana ro ginhimo nga temporaryong pagpapundo sa operasyon it nasambit nga section it tindahan bangud madasig nga natumod ro mga high risk contact it mga nagpositibo.
Kaabuan sigon sa mga may gina-angkon nga sintomas hay nagpositibo sa ginpatigayun nga RT-PCR test.
Nagaeaum man ro opisyal nga indi eon madugangan pa ro mga nagpositibo sa andang banwa.
Ginpasiguro man it bise alkalde nga padayun nga gina-obserba sa andang tindahan ro minimum health protocols agud nga indi eon magkalhit pa ro COVID-19 infection.
