Kalibo Aklan———-Patay eon kat makaabot sa Malay district hospital ro sangka fish vendor matapos nga ginbaril sa Sitio Tabon, Brgy. Caticlan, Malay.
Ginkilaea ro biktimang si Marcial Arguilles, 54-anyos, tubong probinsya it Masbate samtang ro suspek hay ginkilaeang si Ponciano Tayco, 45-anyos, tubong Brgy. Poblacion, Ibajay apang parehong naga-istar sa nasambit nga lugar.
Sa inisyal nga imbestigasyon it Malay PNP, nagapahaom eon kunta nga magkatueog ro biktima kat nakabati raya it sangag sa guwa it andang panimaeay rason nga nagbangon raya ag gin-usisa.
Sa anang pagguwa nakit-an ro suspek nga nagasinggit ag nagapabangod sa biktima nga raya ro nag-eapog sa andang panimaeay.
Magarason eon kunta si Arguilles apang insigida raya nga ginbaril ni Tayco nga nakaangkon it fatal nga igo sa anang eawas nga gintunaan man it anang hinali nga kamatayon.
Sa makaron si Tayco hay presenteng una sa kustudiya it Malay PNP para sa nagakaigong disposisyon.
