KALIBO, Aklan—Ginkondena it nagkaeain-eain nga grupo it fisherfolk ro desisyon it Korte Suprema nga nagapahanugot sa mga commercial fishing vessel nga magpangisda sa municipal waters.
Suno kay Alexandria Padrones, coordinator it Oikos-Panay, padayon nanda nga ginaprotesta ro nasambit nga desisyon bangud sa makabig raya nga pagpamigos sa maintok nga mga mangingisda ag kinahang-ean nga depensahan ro tradisyonal nga pangisdaan.
Tuyo eamang sigon nanda nga protektahan ro 15-kilometrong municipal fishing grounds halin sa interes it mga maeagkuan nga negosyante.
Una kara, nagtipon-tipon ro nagkaeain-eain nga grupo para sa National Assembly of Municipal Fisherfolk agud nga ipanawagan sa Korte Suprema nga baliskaron ro desisyon kara ag ginpaabot nanda ro mga hangkat nga ginapangatubang it mga maintok nga mangingisda bangud sa pagpabor sa komersyal nga pagpangisda.
