KALIBO, Aklan—Nagapadayon ro clean-up drive sa mga mangrove areas ag ro restoration it seaweeds plantation sa kaeawran nga sakop it Caluya, Antique nga eubus nga naapektuhan it tumagas nga langis maghalin sa nag-eogdang nga barkong MT Princess Empress sa Naujan, Oriental Mindoro ko Pebrero 28 it presenteng dag-on.
Suno kay Mr. Broderick Gayona-Train, head it Provincial Disaster Risk Reduction Management Office ukon PDRRMO Antique nga inde eagi maibalik sa dati ro tubo it mga mangroves maging ro mga seaweeds bangud sa kaeapad it nasakop it tumagas nga langis.
Apang, ro manami sigon nga balita hay ginduea eon it lokal nga gobyerno it Caluya ro fishing ban rason nga hilway eon ro mga mangingisda nga mag-eayag agud nga masusteniran ro andang pang adlaw adlaw nga kinahang-eanon.
Mag-eowas kara, nagapadayon man ro relief assistance maghalin sa national ag local government kaeakip eon ro cash for work nga gintaeana sa mga residente.
Ginpahayag dugang nga nag-ayuda man ro pamunuan it kompanya kon sa siin may mga tawuhan man sandang ginpadaea agud nga makabulig sa paglimpyo.
Sa makaron suno kay Train hay nagapadayon ro monitoring it Philippine Coast Guard apisar nga uwa eon it panibag-ong langis nga nakit-an sa kaeawran nga sakop it nasambit nga probinsya.
