Sa pihak it pagpamaeabag it gobyerno probinsyal nga pahugpaan it international flight ro Godofredo P. Ramos airport sa Caticlan, Malay, ginkumpirma ni Punong Barangay Ranny Tolosa nga naghugpa ro kauna-unahang flight it eroplanong Royal Air halin sa Tapei, Taiwan bandang alas-4:45 ko Disyembre 26, 2022 sa nasambit nga paeoparan.
Sakay it nasambit nga eroplano ro masobra sa 200 ka mga pasahero nga paadto sa isla it Boracay.
Panindugan ni Tolosa, posible nga may ginpatigayon nga series of meetings kamana man inspection maghalin sa mismong kumpanya it eroplano kaibahan ro Civil Avaition Authority of the Philippines ukon CAAP bangud nga inde man magrisgo ro mga raya kon bukon it eowas nga hugpaan it international flight ro nasambit nga paeoparan.
Tuyo sigon kara nga makaengganyo it maabong turista bangud nga makatipid eon sanda sa oras it pagbyahe, convenient ag accessible para sa andang destinasyon.
Madumduman nga nagpasa it resolusyon ro Sangguniang Panlalawigan it Aklan sandig man sa mandu ni Governor Joen Miraflores agud nga ipaabot ro andang sentimyento it pagpamaeabag sa nasambit nga tikang.
Apang, nadayon gihapon ro plano it San Miguel Corporation nga sanda ro nagadumaea it paeoparan nga pahugpaan raya it international flight.
Sa makaron hay uwa naganaba sa 35 domestic flights kada adlaw ro may una sa nasambit nga paeoparan eabi eon makaron nga holiday season.
