KALIBO, Aklan–Nagpanumbalik eon sa normal nga operasyon ro mga flights it nagkaeain-eain nga airline companies sa Kalibo international airport.
Bangud kara, ginpahayag ni Engr Eusebio Monserate Jr., general manager it Civil Aviation Authority of the Philippines ukon CAAP-Aklan nga plano nanda nga ibalik sa dating 24 oras ro operasyon it paeuparan eabi eon sa buean it Abril sa pagsueod it summer season.
Sa sueod sigon it masobra sa daywang dag-on nga naeksperyensyahan nga pandemya tuga it Covid-19, mabahoe ro naging epekto kara sa civil aviation industry, apang makaron hay amat-amat eon nga nakakabawi.
Sa kamatuoran, pilang airline companies sigon ro naga-proponer nga madugangan ro andang flights sa paeuparan it tatlong beses sa sang adlaw bangud sa kaabuon it mga pasahero nga nagabiyahe partikular ro mga nagabakasyon sa Boracay.
Naga-average makaron ro domestic flights sa 3 hasta 4 kada adlaw.
Sa pihak nga parte, gindugang pa ni Engr. Monserate nga mabahoe ro posibilidad nga makaangkon eon man it direct flights sa Kalibo international airport .
Suno kana nga may sangka airline company ro naga-propose nga makaangkon it direct flight halin sa South Korea paagto sa paeuparan halin sa buean it Abril.
Sa makaron hay ginabaeay pa ro mga protocols ukon guidelines para kara.
Nasayuran nga antes nga tumama ro pandemya, ro paeuparan hay nagabaton it kapin sa 11 nga domestic flights kada adlaw ag 30 ro international flights.
Bangud sa bag-ong rehabilitate nga paeuparan, makabig suno kana nga haum ro paeuparan sa pagbaton it mga foreign tourists.
