KALIBO, Aklan—Ginapahauman eon it lokal nga gobyerno it Kalibo ro pagbuhos it libu-libong katawo sa pagahiwaton nga libreng concert para sa andang selebrasyon it kapistahan ni Sr. San Juan de Bautista sa Hunyo 23 sa Pook Jetty Port.
Suno kay Mark Sy, Head it Barangay Affairs Office it LGU-Kalibo nga raya hay bangud sa gina-abangan nga performance it sambilog sa pinakasikat nga rapper/singer nga si Flow G.
Maskin suno kana nga medyu mahae ro talent fee it nasambit nga artist hay gintinguhaan raya nga ma-imbitahan ni mayor Juris Sucro agud nga mataw-an it kalipay ro mga kalibonhon ag iba pang mga bisita halin sa nagkaeain-eain nga banwa it Aklan.
Mag-eowas kay Flow G, maga-performan man ro iba pang local artists .
Ro concert hay pagasundan it Color Powder Festival & Hydro Party ag makaangkon man it fireworks display kaibahan si Dj Dan So Chan.
Dikara man masayuran kon sin-o ro maga-uli it brand new nga motorbike nga igapa-raffle it alkalde.
May magadaog man nga sangka winner it 50,000 pesos nga cash ag 10 ro maga-uli it tig-5,000 pesos ag maabu nga iba pa nga halin sa mga kilaeang establisimento.
Naga-umpisa eon suno kana ro pagpanupod makaron it mga raffle tickets agud nga makapasakop .
