KALIBO, Aklan—Ginaeauman it mga miyembro it Federation of Kalibo Tricycle Operators and Drivers Association Incorporated ukon FOKTODAI nga mapasugtan ro ginaproponer ni Kalibo Sangguniang Bayan (SB) member Matt Aaron Guzman nga disenyong prototype divider sa mga tricycle agud nga madugangan ro pasahero nga pwedeng isakay sa sang behikulo sa tunga it pandemya.
Suno kay FOKTODAI president Johnny Damian, kon uwa man nahuman ro andang hinyo nga magpataas it pamasahe bangud nga daywang ka pasahero eamang ro pwede nandang isakay sa kada pagbyahe it mga raya hay maskin daya eon lang nga proposisyon ni SB Guzman ro mapasugtan.
Base sa ginaproponer nga prototype design, sambilog ro makasakay sa prente nga porsyon it tricycle kon sa siin may barrier sa likod ag imaw man ro matabo sa likuran nga bahin it behikulo kon sa siin makaangkon man it divider sa magtimbang nga pasahero para makasakay it daywa kamana man kaparehong tikang ro himuon sa tunga it driver ag backrider.
Bangud kara, madugangan eon maskin papaano ro kita nga igauli it mga drivers sa andang pamilya.
Kon sumahon sigon hay lugi sanda nga mayad bangud nga bukon it tanan nga pasahero hay nagapasugot sa andang hinyo nga dugangan ro andang pamasahe.
Ginpahayag dugang ni Damian nga mabahoe eon raya nga bulig sa andang pangitan-an nga raya manlang man ro ginasaligan it andang pamilya sa pang-adlaw adlaw nga pagkaon ag iba pang kinahang-eanon.
