KALIBO, Aklan—Ginpasiguro it Federation of Kalibo Tricycle Operators and Drivers Association Inc. ukon FOKTODAI nga indi anay sanda magpatuman it fare increase sa tunga it padayun nga pagtinaas it presyo it produktong petrolyo.
Suno kay FOKTODAI President Johnny Damian, apisar nga mabahoe ro naging epekto sa andang kita it sigidas nga pagsipa it presyo it gasolina hay indi anay sanda maghimo it tikang para maghinyu it pagpataas sa pamasahe.
Suno kana, pagahueaton eon lang nanda ro igatao nga fuel subsidy it national government para sa sektor it transportasyon.
Nagaeaum man si Damian nga makaabot kanda ro nasambit nga subsidiya bangud mabahoe raya nga bulig sa kaparehas nana nga driver.
Sa ginpatigayun nga consultative meeting it Sangguniang Bayan it Kalibo, ginpahayag ni Damian nga posibleng maghimo it sangka flexible nga ordinansa ro lokal nga gobyerno angot sa nagakatabo nga oil price increase ag rollback nga pagabasehan it igapatuman nga taripa.
Samtang, ginpaathag man kara nga ro resolution nga ginhimo it Sangguniang Bayan hay tuyo nga maghinyu sa mga kompaniya it langis nga magtao it diskwento sa mga tricycle driver nga may prangkisa agud nga mapahagan-hagan ko epekto it pagtaas it presyo it gasolina.
