KALIBO, Aklan—Padayun nga naga-apela ro mga tricycle drivers and operators sa Department of Interior and Local Government ukon DILG kamana man sa mga opisyal nga ipaiway anay ro plano nga pagbawae sa mga tricycle nga mag-agi sa national highway.
Suno kay Johnny Damian, presidente it Federation of Kalibo Tricycle Operators and Drivers Association Inc. (FOKTODAI) nga pasugtan anay sanda nga gamiton ro national highway samtang owa pa it gintaeana nga alternatibong daean sa banwa it Kalibo.
Sa kamatuoran suno kana hay mabuhay eon ro nasambit nga memorandum it DILG.
Eubus sigon nga maapektuhan kara hay ro mga commuters.
Nasayuran nga ro nasambit nga mandu hay gin-isyu ni DILG Secretary Eduardo Año sa tanan nga mga city ag municipal mayors matapos nga mataeupangdan ro mga nagabiyaheng tricycle sa national highways.
Maskin sigon nga mabahoe nga bulig ro tricycle operations para sa pangabuhian it mga drivers, apang peligroso sigon ro andang pagbiyahe sa mga national highway, kun sa siin, naga-agi ro mga mabahoe ag madasig nga mga behikulo.
Aminado man si Damian nga pila gihapon sa mga tricycle drivers hay padayun nga nagagamit it fast lane sa baylo nga sa right lane para sa mga slow-moving vehicles.
