KALIBO, Aklan—May apela ro Federation of Kalibo Tricycle Operators and Drivers Association Inc. ukon FOKTODAI sa Sangguniang Bayan it Kalibo angot sa ginaproponer nga dugangan it ap-at ro pasahero nga pwedeng makasakay sa tricycle.
Suno kay FOKTODAI president Johnny Damian nga engkaso nga raya hay maaprubahan, indi eon pagbawasan ro andang ginasukot nga pamasahe sandig sa andang taripa makaron.
Nasayuran nga nauna eon nga ginrekomendar it SB sa Provincial Inter-Agency Task Force on Covid-19 ro ginproponer nga “design” para sa mga tricycle nga nagabiyahe sa banwa it Kalibo.
Suno kay SB member Matt Aaron Guzman, chairman it committee on transportation nga hasta sa makaron hay owa pa it approval ro provincial task force para kara.
Rason nga naisipan nanda nga obrahon eon lang raya nga ordinanda nga kinahangean nga magsunod sa proseso rason nga medyu mabuhayan.
Apang mas mayad suno kana ag makabulig it mabahoe sa mga tricycle drivers nga madugangan ro andang kita engkaso nga aprubahan raya it provincial ukon regional task force eabi pa ag ro aklan hay una makaron sa general community quarantine ukon GCQ.
Base sa design ni Guzman, pagabutangan it dugang nga plastic barriers ro likod it tricycle.
Samtang, plano man nanda nga sambilog eamang ro igadugang nga pasahero agud nga indi eon pagabawasan ro pamasahe.
Ginaproponer man nanda nga makaangkon it public hearing angot kara agud nga mabo-oe ro pulso it publiko.
Sa pihak nga parte, nagpahayag man it pagpabor sa nasambit nga plano si Sangguniang Panlalawigan member Nemesio Neron, chairman it committee on communications and transporation.
Basta kinahangean suno kana nga masunod ro health and safety protocol para sa kaeowasan it mga pasahero.
Ro proposed ordinance sigon hay owa pa naka-abot sa SP.
