KALIBO, Aklan—Ginahueat pa it mga miyembro it Federation of Kalibo Tricycle Operators and Drivers Association Incorporated ukon FOKTODAI ro magiging sabat it Regional Inter-Agency Task Force angot sa andang ginaduso nga ordinansa nga ubrahong tatlo ro sakay nga pasahero sa mga tricycle nga nagabyahe sa banwa it Kalibo.
Suno kay FOKTODAI President Mr. Johnny Damian nga aprubado eon it Sangguniang Bayan it Kalibo ro nasambitang ordinansa.
Sa makaron hay pending pa sigon ro andang request bangud owa pa it sabat ro Region.
Ro plano sigon ngara nga pagdugang it pasahero hay bilang preparasyon engkaso nga madayun ro implementasyon it face-to-face classes sa masunod nga dag-on.
Raya sigon hay ginabase nanda sa volume it mga tawo.
Sa oras nga maumpisahan eon sigon ro face-to-face classes hay nagakahueogan man raya nga maga-taas ro numero it mga sumaeakay bangud sa mga estudyante.
Sa makaron hay nagapabilin nga 10 pesos ro panueoktan it pamasahe sa mga tricycle nga nagabiyahe sa barangay Poblacion, Kalibo.
