KALIBO, Aklan—Suportado it Federation of Kalibo Tricycle Operators and Drivers Association Inc. ukon FOKTODAI ro pagahiwaton nga re-routing dry run umpisa Pebrero 15 hasta 28, 2021 it lokal nga gobyerno it Kalibo pinaagi sa andang Transport and Traffic Management Division.
Tuyo kara nga mataw-an it daean ro implementasyon it Municipal Ordinance No. 2020-02 may kaangtanan sa Transport and Management Code it banwa kamana man ro Memorandum Circular No. 2020-036 it DILG nga nagabawae sa mga tricycles nga mag-agi sa mga national highways.
Suno kay Johnny Damian, presidente it FOKTODAI nga pabor sanda sa ginduso nga sueundanan agud nga ma-de-congest ag mapahagan-hagan ro numero it mga tricycles sa mga masako nga daeanon ag national highways sa Kalibo.
Sa kamatuoran suno hay sanda nga mga drivers ag operators ro naghinyu nga ipatuman eon ro nasambit nga re-routing scheme agud nga matumod nanda ro andang natungdan nga mga terminal area ag kon siin nga kalye ro andang paga-agyan nga indi eon magatuga it pag-gutok it trapiko sa mga national highways.
Ginpaiway man suno kana ro implementasyon kara ko nagtaliwan nga dag-on bangud sa covid 19 pandemic.
May kaangtanan man sigon ro nasambit nga tikang sa mas ginpabaskog nga road clearing 2.0 it munisipyo sandig sa Memorandum Circular No. 2020-027 it DILG sa paglimpyo sa mga sabeag sa daeanon.
Ginpaathag pa ni Damian nga bawae eon nga mag-agi ro mga kaibahan sa route 4 ukon tricycle nga may rotang poblacion kalibo sa roxas avenue, apang pwedeng makatabok.
Bonus man kanda ro paghatud it mga pasahero sa eastern side terminal ag st jude Thaddeus church, apang indi eon sanda makaeusot sa AHNSAT ag aklan state university bangud nga bukon eon nanda it sakop ro nasambit nga lugar.
Sa Capitol Site Kalibo, ro andang boundary hay hasta eamang sa Garcia College of Technology ag paliko sa Development Bank of the Phillipines.
Samtang, ro route 1 hasta 3 hay may kanya-kanya nga terminal area ag daean nga pwedeng agyan.
Bangud nga owa pa it alternatibong rota ro halin sa linabuan norte paagto sa banwa it kalibo, ginapasugtan sanda sa national highway basta nga mag-agi pirme sa outer lane.
Gina engganyo man nana ro tanan nga mga may obserbasyon sa dry run nga ipaabot ro andang reklamo.
