KALIBO, Aklan—Suportado it Federation of Kalibo Tricycle Operators and Drivers Association Inc. ukon FOKTODAI ro proposisyon nga pagpatuman it “No Movement Sunday” sa banwa it Kalibo.
Suno kay FOKTODAI President Johnny Damian nga haum sanda nga magsunod engkaso nga maipatuman ro pag-angkon it sang adlaw nga rest day ukon holiday sa Kalibo.
Dugang pa kara nga ro pandemya hay away it tanan ag bilog nga komunidad rason nga dapat eamang nga magsunod sa ginapatuman nga patakaran it lokal nga gobyerno.
Nagapati si Damian nga ro nasambit nga tikang hay para sa kaeuwasan it tanan kontra sa deadly virus.
Aminado man raya nga mabahoe ro naging epekto it pandemya sa andang pangabuhian eabi eon ro pagpatuman it mga pag-instrikto.
Samtang, ginpasaeamatan man kara ro inisyatibo ni Kalibo Mayor Emerson Lachica nga maeakip ro mga driver bilang sambilog sa mga sector nga prayoridad mabakunahan.
Madumduman nga gin-aprubahan eon sa session it Sangguniang Bayan it Kalibo ro resolution nga gindihon ni SB member Ketchie Luces angot sa pagpatuman it No Movement Sunday.
Sa makaron, ginahueat eon lang ro magiging sabat kara it Municipal Inter-Agency Task Force (MIATF) ag it local chief executive.
