NATIONAL News — Ginpirmahan eon ni Department of Agriculture (DA) Secretary Francisco Tiu Laurel Jr. ko Lunes, Pebrero 3, ro pormal nga deklarasyon it food security emergency sa bugas bangud sa gina-alegar nga “extraordinary increase” sa presyo kara sa idaeum it Department Circular No. 03.
Suno sa DA, raya hay base man sa rekomendasyon it National Price Coordinating Council (NPCC) tuga it padayun nga indi mapaathag nga pagtaas sa presyo it bugas sa nasyon sa pihak it pagnaba it pangkalibutanon nga presyo ag pagbawas sa taripa ko Hulyo 2024.
Paathag ni Laurel, pinaagi sa pagdeklara it emergency, pagapasugtan sanda nga magpaguwa it reserbang bugas halin sa National Food Authority (NFA) agud nga mapanaba ro presyo ag masiguro nga makabakae ro mga konsyumer.
Base sa datos halin sa Philippine Statistics Authority, nakita ro pagtaas it rice inflation it 17.9% ko nagtaliwan nga dag-on nga imaw ro gin-obra nga basehan it NPCC.
Sa idaeum it gin-amiyendahang Rice Tariffication Law, may gahum ro agriculture secretary nga magdeklara it food security emergency sa bugas tuga it kakueangan kara ukon bangud sa pagtaas it presyo.
Samtang, ginkuwestiyon it Federation of Free Farmers (FFF) kun ham-an nga nagamadali ro NFA nga ibaligya ro mga bugas kara matapos sigon nga makabo-oe it impormasyon ro grupo nga puno pa ro mga bodega it ahensiya.
Ginpaathag it FFF, raya sigon ro rason kon ham-an nga nagamadali ro NFA nga ibaligya ro mga ginabuytan kara nga bugas bangud nga owa it mabutangan it pagabak-eon nanda nga mga paeay nga paga-anihon it mga mangunguma makaron nga buean.
Ro deklarasyon it food security emergency sa bugas ro gingamit sigon nga rason agud nga mabaligya ro bugas nga una sa mga bodega it NFA nga luma eon antes pa raya nga bukbukon.
Ginpahayag ni FFF president Dioscoro Granada, nalikawan kunta ro problema kun ginpanupod it NFA ro bugas sa mga gindaeasa it bagyo ko 2024 ag kun nagplastar it programa ro ahensiya kun paalin nga ibaligya ro mga lumang bugas.
Owa nagapati si Granada nga puno eon ro mga bodega it NFA bangud nga sang milyong tonelada ro kapasidad it mga raya ag 300,000 tonelada eamang ro andang ginabuytan.
