KALIBO, Aklan–Padayun ro pagtaas it foreign tourist arrivals sa Isla it boracay bangud sa pag-angkon it international flights it pilang mga airline companies sa tunga it Kalibo International Airport ag Incheon International Airport.
Suno kay Engr. John William Fuerte, head it Civil Aviation Authority of the Philippines ukon CAAP-Aklan nga mag-eowas sa flag carrier nga Philippine Airlines, may una nga ap-at nga iba pang South Korea-based carriers ro naga-operate makaron sa paeuparan.
Ro T’way ag Jin Air hay may daily flights samtang ro Air Seoul, Air Busan ag PAL hay may naka-schedule nga flights nga tatlong beses sa sang domingo.
Apang korondaya eamang sigon nakaangkon it adjustments matapos nga ko Hulyo ag katung-anan it Agosto hay daily ro andang biyahe.
Ginaeauman nga sa katapusan it dag-on hay makaangkon man it international flights halin sa ibang nasyon mag-eowas sa south korea.
Ro kada eroplano suno kana hay may average nga pasahero nga 120 hasta 130 nga kaeabanan nga mga koreano nga nagabakasyon sa Boracay.
Ginpanginwaea man nana ro mga nagkalhit nga balita ko nagtaliwan nga mga inadlaw nga kanselado eon ro mga international flights sa Kalibo airport.
Sa pihak nga parte, adlaw-adlaw eon suno kana ro domestic flights sa Kalibo airport nga may rotang kalibo-manila ag manila-kalibo.
Ro flag carrier nga Philippine Airlines, Cebu Pacific ag AirAsia hay may una nga pitong flight kada adlaw nga may average nga pasahero nga 130.
Samtang, nagapadayun suno kana ro mga development projects it DOTr kapareho it land acquisition ag expansion sa nasambit nga airport kun sa siin temporaryong nagpundo ko tiempo it eleksyon.
