KALIBO, Aklan — Nagapadayun ro case build-up it ginbilog nga task force it Aklan Police Provincial Office (APPO) angot sa makangieidlis nga pagpatay sa 23 anyos nga turistang Slovak sa Isla it Boracay.
Suno kay P/Lt. Aubrey Ayon, nagatindog nga spokesperson it Special Investigation Task Group (SITG) nga ginabuligan sanda it sangka prosecutor sa pagpahaum it mga dokumento ag natipon nga mga ebidensiya.
Dugang pa nga nagahueat pa sanda it resulta it andang gin-request nga forensic evidence partikular ro DNA, fingerprints, ag trace evidence, para makabulig sa pagtumod sa pagkatawo it mga suspek.
Samtang, pila sigon sa mga pahayag it sambilog sa mga ginakabig nga person of interest sa kaso sa anang gin-execute nga Extrajudicial Confession sa Office of the Provincial Prosecutor hay nagakasinanto sa resulta it ginpatigayon nga medico legal examination eabi eon ro anang cause of death nga blunt force trauma ukon pag-eampos it matig-a nga bagay sa anang ueo.
Mag-eowas kara, nakumpirma man nga ro biktima hay ginhimuslan.
Madumduman nga si Mikaela Mickova hay nasapwan bandang alas-2:19 hapon it Marso 12, sa sangka abandonado nga chapel sa Zone 3, Sitio Pinaungon, Barangay Balabag nga una eon sa state of decomposition.
Sa makaron hay may ginatumod eon nga tatlong makabig nga persons of interest sa pagkamatay it 23 anyos nga Slovakian tourist, apang suno kay Ayon hay posibleng madugangan pa raya depende sa nagapadayun nga imbestigasyon.
Samtang, ginpahayag dugang ni P/Capt. Ayon, padayun ro andang koordinasyon sa pamilya it biktima pinaagi sa konsulada it Slovakia angot sa daeagan it kaso.
Dugang pa nana nga mabahoe man nga bulig ro ginpaguwa nga P100,000 nga padya para sa pagturo sa mga suspek sa krimen.
