Nagapadayon ro maeapad nga forest fire sa Kalimantan, Indonesia, nga posible nga raya ro ginhalinan it haze nga napan-uhan sa pila ka parte it Pilipinas, eakip ro Aklan.
Suno kay Gina Limpin Kumla, Bombo International correspondent sa Indonesia, nag-umpisa ro sunog ku Agosto 28 ag nageapta eon sa maeapad nga parte it Kalimantan.
Base sa anang impormasyon, 1,511 hectares eon ro apektado it sunog. Ginaturo nga posible nga may kaangtanan sa aktibidad it tawo ro sunog, samtang ginapabahoe man it mainit ag mamaea nga tyempo ro pageapta it kaeayo.
May mga palm oil plantation man sa lugar, nga ginakabig nga isaea sa mga rason nga nagakaduea ro tubi sa mga peatland ag madali masunog ro eugta.
Ginpahueag it gobyerno it Indonesia ro militar, pulis, disaster response teams ag environment authorities para sa operasyon sa pagpatay it sunog.
Nagpadaea man sigon ro Japan it daywang ka Chinook helicopters ag personnel para magbulig sa ground operations. Suno kay Kumla, may mga Filipino engineer ag workers nga nagatrabaho sa Borneo, apang uwa pa imaw nakabati it ginasugid nga Filipino casualty bangud sa sunog.
Ginapaandam man nga bangud maeapit ro Borneo sa Pilipinas ag ginadaea it hangin ro haze, posible raya nga makaabot sa pila ka lugar sa pungsod.
