KALIBO, Aklan—Pabor si dating Nabas mayor Romeo “Lolong” Dalisay sa ginaduso it Tibyog Akean nga united leadership rason nga nakumbinsi imaw nga mag-ober-da-bakod sa administrasyon para sa nagahilapit nga 2022 national and local elections.
Suno kana nga importante ro pagkaeasugot makaron agud nga madali nga maeampasan ro ginapangatubang nga pandemya nga tuga it coronavirus disease 2019 ukon covid 19.
Ginkumpirma man nana nga mismong sanday Aklan Governor Florencio Miraflores ag Congressman Ted Haresco ro nakipag-istorya kana angot sa nasambit nga ideya.
Plano kunta nana nga uman nga magbalik bilang mayor it Nabas, apang nagpaiway agud nga mataw-an it daean ro kandidatura ni Vice Mayor Wilfredo Cezar kabaylo ni Mayor James Solanoy nga magapadaeagan bilang vice mayor.
Posible sigon nga maging pambato it oposisyon sa pagka-alkalde si Noli Palomata.
Nagdesisyon sigon imaw nga magpadaeagan eon lang bilang Sangguniang Panlalawigan member sa western side.
Haeos kompleto eon man sigon ro andang linyada sa banwa it nabas ag gina-istoryahan pa ro petsa it pag-file nanda it certificate of candidacy sa buean it Oktubre.
