Kalibo Aklan —-Nagapadayun ro pagbaton it franchise renewal it mga tricycle operators it Sangguniang Bayan (SB) it Kalibo .
Suno kay Diane Figarido, SB Secretary nga ro andang ginaproseso sa makaron hay ro pag-transfer it ibang franchise sa andang legal nga asawa ukon mga unga sandig sa ginapatuman nga ordinansa.
Nasayuran nga ro mga operators nga may daywang motorized tricycle operator permits (MTOPs) hay gina-abisuhan nga isaylo ro sambilog nga franchise sa andang asawa ukon unga.
Bangud nga kon indi hay pagakanselahon it SB .
Ginaduso makaron it LGU kalibo ro “One Motorized Tricycle Operator’s Permit ukon franchise, One Holder/Operator Policy”, apang ginahueat pa kara nga mapatuman ro Traffic Code it Kalibo.
Angot kara, gin-engganyo ni Figarido ro mga nagapa-renew it franchise nga mag-agto eon sa andang taeatapan sa mas temprano bangud nga may nagakaigo nga multa nga 2,500 pesos ro sin-o man nga mapas-eawan .
Ginlaygay pa kara nga siguraduhon man it mga raya nga nakasunod sanda mga requirements nga nakasandig sa ordinnasa.
Sambilog eon kara ro pagiging registered voter it banwa it kalibo ag water ag electric bills nga magapamatuod nga residente it banwa .
Aminado man si Figarido nga maabu ro nakapending nga application bangud sa kakueangan it mga requirements kun sa siin hay nakataeanang igasumite sa SB para sa konsiderasyon .
Ginasugid nga may pilang operators it pampasaherong tricycle nga presenteng nagabuyot it daywang franchise ag naga-angkon it daywang units man tricycle.
Nakasanayan man sigon it pilang nagapanag-iya it franchise nga ibaligya ro andang prangkisa it kapin sa P100,000 pesos nga hugut nga ginabawae sa ordinansa kun sa siin raya makaron ro ginabantayan it SB bangud nga ro mga nakabakae kara hay indi maka-renew sa idaeum it andang pangaean.
