KALIBO, Aklan—Magabalik operasyon eon sa masunod nga domingo ro naga-isaeahanon nga crematorium sa bilog nga isla it panay nga naga-asikaso sa mga namatay sa COVID 19.
Sa eksklusibong interview it Bombo Radyo Kalibo kay Mrs. Fely Abecia, tag-ana it Gegato Abecia Funeral Homes Incorporated & Crematory nga temporaryo nanda nga ginpapundo ro andang operasyon it haeos daywang domingo agud nga mataw-an it nagakaigo nga oras nga matapos ro pag-cremate sa mga nagtambak nga mga patay.
Mag-eowas kara, igapaidaeum man sigon nanda sa nagakaigo nga disinfection ro lugar.
Samtang, agud nga indi eon mauman ro pagtambak it maabu nga mga bangkay nga namatay sa Covid 19, nagbakae sigon sanda it freezer van sandig man sa suhestiyon it city government of Iloilo agud nga may pagabutangan sa mga raya samtang nagahueat it schedule it cremation.
madumduman nga naboe-an it video ro patong-patong at nagakaealhit nga mga kabaong sa saeog it nasambit nga crematorium.
Gindugang pa ni Abecia nga haeos 20 nga ka bangkay eamang ro masarangan it andang “human cremation machine” kada adlaw, apang maskin sanda hay nakibot umpisa ko katung-anan it Hulyo kun sa siin, buhos ro pag-aeabutan it bangkay it mga covid 19 victim halin sa nagkaeain-eain nga probinsiya it panay.
Angot kara, ginpasiguro it funeral homes nga ginataw-an it nagakaigo nga respeto ag pagtrato ro nasambit nga mga bangkay.
