Mas kapin pang nagabaskog ro panawagan it nagkaeain-eain nga grupo, asosasyon ag organisasyon sa gobyerno nga suspindihon eon ro fuel excise tax sa tunga it paglobo it presyo it produktong petrolyo sa pangkalibutanong merkado.
Suno kay Leody de Guzman, national president it Partido Lakas ng Masa, minatuod nga madueaan it masobra sa P100 bilyon pesos nga kita ro gobyerno apang kon ro kabaylo kara hay sangkiri nga kasoehayan sa pumueoyo, mas mayad eon lang raya kaysa sa gina-corrupt manlang ro pondo it mga gahaman nga opisyales it gobyerno.
Ginpaathag ni de Guzman nga kon masuspinde eon ro fuel excise tax hay maganaba man it presyo ro mga fuel cartel nga mabahoe nga bagay para sa tanan eabi eon sa sektor it transportasyon.
Kon maganaba ro presyo it langis, magapabilin sa dating presyuhan ro mga basic commodities, makaangkon it bastanteng produksyon sa pagkaon ag makatao man raya it sangkiri nga kasoehayan ag mabuhinan ro kabaeaka it mga minimum wage earners.
Mabaskog ro andang panawagan nga inde eon raya pag-idelay ni Pangueong Ferdinand Marcos Jr. ag insigida eon nga magdesisyon bangud nga kon magbuhay pa ro makaraya nga sitwasyon hay mas kapin pang malisdan ro publiko.
