Ginaboeobanta nga 10,000 nga mga driver it public utility vehicles (PUV) sa Western Visayas ro makabaton it fuel subsidy halin sa Department of Transportation (DOTr) ag Land Transportation Franchising and Regulatory Board (LTFRB).
Sa makaron hay ginapadasig eon it mga awtoridad ro pagproseso it mga dokumento ag gina engganyo ro mga benepisyaryo nga magbukas it e-wallet accounts para sa distribusyon it ayuda.
Suno sa LTFRB Region 6, presenteng nagapatigayon it overtime ro ahensya agud nga makumpleto ro mga kinahangeanon nga papeles nga igapasa sa Central Office para mapadasig ro pagpaguwa it subsidiya.
Umpisa ko nagtaliwan nga domingo hay nagasumite eon ro regional office it mga requirements, kaibahan ro listahan it mga kwalipikadong driver it modern ag tradisyunal nga jeepney ag iba pang klase it pampublikong transportasyon.
Kaibahan sa nasambit nga programa ro mga tricycle driver bangud nga ro andang datos hay ginadumaeahan it andang natungdan nga LGUs.
Sakop man kara ro mga driver it consolidated modern ag tradisyunal nga jeepney, pati man ro mga taxi ag iba pang PUV.
Samtang, angot man sa mga jeepney nga bukon pa it consolidated, ginpahayag it LTFRB nga ginahueat pa nanda ro mga opisyal nga sueundanan kon sanda hay maeakip sa subsidiya.
Sa makaron hay indi pa matumod ro ensaktong kantidad nga mabaton it kada driver bangud nga raya hay nakadepende sa kabilugan nga pondo ag sa pinal nga numero it mga benepisyaryo.
Agud nga masiguro ro maayos nga pagpanupod, ginhinyu it LTFRB sa tanan nga driver nga magbukas it e-wallet accounts kapareho it GCash ukon PayMaya, kun sa siin direktang igapasueod ro subsidiya.
Ro e-wallet account hay dapat sigon nga nakapangaean mismo sa driver agud nga malikawan ro problema sa beripikasyon.
Para man sa mga driver it modern jeepneys nga sa idaeum it kooperatiba ukon korporasyon, direktang igapasueod ro subsidiya sa Land Bank of the Philippines accounts it andang organisasyon.
Ginklaru it LTFRB nga ro fuel subsidy halin sa DOTr-LTFRB hay separado pa sa bulig nga igatau it Department of Social Welfare and Development (DSWD).
Naisumite eon ro listahan it mga driver sa DSWD nga sanda ro magataeana it schedule ag haega it andang igapanupod nga ayuda.
