KALIBO, Aklan–Ginklaro it lokal nga gobyerno it Kalibo nga owa pa sanda nakabaton it kongkreto nga basehan angot sa proseso it igatao nga fuel subsidy para sa mga tricycle driver.
Raya hay sa pihak nga gintugyan eon it Department of the Interior and Local Government (DILG) sa mga alkalde ro responsibilidad sa pagsumite it listahan it mga kwalipikadong benepisyaryo it subsidiya.
Suno kay Dianna Fegarido, Secretary it Sangguniang Bayan it Kalibo nga owa man ginmitlang sa ginpagguwa nga memo angot sa Pantawid Pasada Program para sa mga tricycle driver kung paano ro proseso, pila ro balor it ayuda ag kung hin-uno raya igatao.
Ro nakabaehag eamang sigon hay ro pagpangayo it data it mga tricycle driver nga kwalipikado sa programa.
Ro fuel subsidy hay kaparte it programa it gobyerno sa sektor it transporasyon nga sambilog sa eubos nga naapektuhan it sigidas nga pagtinaas it presyo it produktong petrolyo.
Nasayuran nga naga-abot sa masobra 3,000 ro lehitimong franchise holder nga mga tricycle driver sa banwa it Kalibo.
