Ginpasiguro it Land Transportation Franchising and Regulatory Board (LTFRB) nga magapadayun makaron nga Agosto ro pagpatuman it Fuel Subsidy Program para sa mga tsuper ag operator it mga pampublikong saeakyan.
Suno kay LTFRB Chairperson Vigor Mendoza, presente pang ginatapos it ahensya ro pagdesisyon kon pila ro subsidiya ag ro sakop it mga benepisyaryo agud nga masiguro nga insigida raya nga maipatuman.
Sa makaron, ginatun-an eon it ahensya ro pagtau it fuel discount nga kapin sa P15 hasta P20 kada litro, depende sa magiging pinal nga pagtantiya it Department of Energy sa ginaeauman nga pagtaas it presyo it diesel sa masunod nga domingo.
Tuyo it programa nga mapahagan-hagan ro epekto it padayun nga pagtaas it presyo it langis sa mga Public Utility Vehicle operator ag driver, samtang ginapasiguro ro dere-deretso nga pagtau it maayos nga serbisyo sa mga commuter.
