KALIBO, Aklan—Gin-uyog it 7.3-magnitude nga linog ro nasyon it Japan.
Suno kay Bombo International Correspondent Josel Palma it Tokyo, Japan, nakit-an ro sentro it linog sa Fukushima region nga may kadaeomon nga 60 kilometers rason nga gin-abisuhan ro tanan nga mag-andam sa posibleng pag-angkon it tsunami.
Angot kara, masobra sa daywang milyon ka mga panimaeay ro nawad-an it supply it kuryente kaeakip eon ro 700,000 sa capital city nga Tokyo.
Ginpahayag dugang ni Palma nga ro nasambit nga prefecture hay nauna eon man nga gin-igo it makamaeatay nga linog nga nag-aywan it linibo katawo nga mga namatay.
Sa inisyal nga report it mga otoridad, 88 katawo sigon ro mga ninahan samtang sambilog pa eamang ro nailistang namatay maghalin sa nagkaeain-eain nga prefectures.
Sa makaron suno kana hay ginausisa eon it mga otoridad nga ginpangunahan ni Prime Minister Fumio Kishida ro halit it nasambit nga mabaskog nga linog.
Nasayuran nga ro Japan hay ginakabig nga sambilog sa Pacific “Ring of Fire” rason nga haeos uwa it dag-on nga uwa gina-uyog ro nasambit nga nasyon kon siin ro andang mga panimaeay ag edipisyo hay nakadesinyo sa posibleng pag-igo it mga linog.
