KALIBO, Aklan–Boluntaryo nga nag-surrender ag temporaryong una sa kostudiya it Kalibo Municipal Police Station ro sangka nag-eskapo nga preso it Aklan Rehabilitation Center (ARC) nga si Randy Fulgencio.
Ginapahayag nga nagpadaea it mensahe sa sambilog nga katapo it Kalibo PNP si Fulgencio para magsurrender apang sa kondisyon nga indi imaw pag-ibalik sa ARC.
Base sa pag-istorya ni Fulgencio, bandang alas-12:30 it udtro adlaw ko Hunyo 6 kat mag-eskapo imaw sa pasilidad matapos makabuoe it tyempo samtang naga-ilabas ro mga jail guard.
Dugang pa kara nga manaba eamang ro pader rason nga sarang nana nga sakaon.
Matapos ro insidente hay insigida imaw nga nagdiretso sa bahin it Culasi, Antique.
Owa man sigon it maeain nga natabo kana sa sueod it ARC kundi may personal eamang imaw nga problema.
Kaangot kara, malipayon ag nakabatyag eon it ginhawa ro ina it inmate nga si Marilita Fulgencio matapos raya nga kusang bumalik sa sabak it gobyerno.
Pabor sigon imaw nga nag-surrender ro anang unga kun siin gusto eon nana raya nga magbag-o ag atubangon ro mga saea nga nahimo.
Samtang, ginpaathag man ni Elma De Felix, tiya ni Randy nga makaron pa eamang nanda raya uman nga nakita halin kat mag-eskapo sa ARC masobra sang buean eon ro nagtaliwan.
