KALIBO, Aklan–Humakot it nagkaeain-eain nga komento ag reaksyon halin sa mga netizen ro viral video ag photos nga ginpakigbahin sa social media ni Pitter Magsipoc it Culasi, Antique.
Raya hay matapos imaw nga magpost it funeral themed nga birthday celebration it anang katrabaho nga si John Michael Domingo ko Enero 18.
Buoe ro mga litrato ag video sa restaurtant nga ginapanag-iyahan mismo it andang amo.
Suno kay Magsipoc, owa nanda ginaeauman nga magviral ro post nga makaron hay naga-abot sa masobra 1 million views.
Ro utak ag nagtao sigon it ideya angot sa rayang tema it selebrasyon hay ro andang amo nga babaye bangud mahilig raya nga mag-isip it mga pakulo sa kaadlawan it anang mga empleyado.
Samtang, positibo man kara nga ginbaton ro pagpang-bash ag kritisismo it iba sa anang post.
Dugang pa ni Magsipoc nga ginarespito nana ro panan-awan it kada isaea bangud may kanya-kanya kita nga pagbaton ag pagti sa mga bagay.
Aminado man imaw nga maabu eon nga mga vlogger ag social medica personality nga nag-message kana kung siin posible man sigon nana nga ikonsidera ro vlogging.
Sa pihak nga parte, naging emosyonal man ro birthday celebrant nga si John Michael Domingo matapos nga makita ro pamatay nga surpresa kana it anang mga katrabaho ag amo.
Owa sigon nana ginaeauman nga maga-effort it sobra ro mga raya para maging extra special ro anang kaadlawan.
Madumduman nga base sa mga litrato nga gin-upload, makit-an ro sangka kabaong nga himo sa karton kung siin dikara nakasueod ro mga handa nga ginaeakipan it spaghetti, fried chicken ag cake nga may itsura pa ni Dominggo.
