KALIBO, Aklan—Sangka tag-ana it furniture shop ro nagpaabot it reklamo sa Bombo Radyo Kalibo matapos nga ginkumpiska it mga otoridad ro anang iga-deliver kunta nga gin-order nga tatlong pwertahan nga may carving ag hamba ko agahon it nagtaliwan nga Abril 6, 2021 pag-abot sa banwa it Tangalan.
Suno sa tagreklamo nga si Josue Senatin, residente it Brgy. Rigador, Ibajay ag haeos 15 anyos eon nga naga-operate it anang furniture shop nga gina-usuyan sanda it delivery receipt para sa iga-deliver nga furniture nga nagabalor tanan it kapin sa P12,000 pesos.
Maskin suno kana ro anang saeakyan nga ginagamit sa andang pag-deliver hay gin-impound.
Gusto sigon nanda nga mapadasig eon ro pagresolba sa andang kaso agud nga mabo-oe eon ro andang saeakyan nga ginagamit sa andang negosyo.
Nagapanindugan man si Senatin nga kompleto sanda sa nagakaigo nga dokumento sa andang furniture shop.
Mas pa sigon nga naka-pending makaron ro pag proseso sa andang kaso matapos nga temporaryong ginpasarado ro taeatapan it DENR-PENRO Aklan para sa paglimpyo ag disinfection.
Haeos daywang beses eon sigon sanda nga nagpabalik-balik sa nasambit nga opisina apang owa pa it notice para sa andang hearing.
Sa kustodiya makaron it pasilidad it DENR sa Jawili, Tangalan ro mga nakumpiskang items bangud sa gina alegar nga pag-eabag sa PD 705 ukon mas kilaea sa tawag nga Revised Forestry Code of the Philippines.
