Ginbatikos it Gabriela partylist ro plano ni Pangueong Bong Bong Marcos Jr. nga mag import it mga asukar bangud sigon raya hay magasabotahe sa local sugar industry.
Suno kay Assistant Minority Leader at Gabriela Women’s Party Representative Arlene D. Brosas, ro pagpasugot it gobyerno nga mag import it 440,000 metric tons it refined sugar hay makaangkon it mabahoe nga epekto sa local sugar industry ag raya hay posibleng maging rason it pagkaduea it trabaho it libo-libong sugar farmers ag empleyado it nasyon.
Ginpahayag dugang pa kara nga nakita eon sigon ro epekto it sobra sobrang importasyon it agricultural products sa mga rice farmers sa administrasyong Duterte matapos ipasa ro Rice Liberalization Law ag makaron mat-a sa administrasyong Marcos hay local sugar industry ro eubos nga maapektohan.
Madumduman nga ko December 15,2022 ro Central Azucarera Don Pedro Inc., ro pangaywa sa pinakamabahoe nga supplier it asukar sa Luzon hay nagsara bangud sa operational ag financial challenges.
Ginsuhesiyon ni Assistant Minority Leader ag Gabriela Women’s Party Representative Arlene D. Brosas nga ro pinaka epektibong solusyon sigon kara hay ro pagtao it subsidiya para sa operasyon it mga sugarcane planters.
Samtang, nagsumite it House Resolution 785 ro Gabriela Women’s Party para magpatigayon it inquiry angot sa pagsara it Central Azucarera Don Pedro Inc. Ag ro epekto kara sa sugar workers ag farmers sa Batangas.
