KALIBO, Aklan—Uman nga ginbatikos it Gabriela Women’s Organization ro naging tikang it gobyerno agud nga malikawan ro grabe nga epekto it sigidas nga pagtinaas it presyo it mga produktong petrolyo.
Suno kay Lucy Francisco, regional director it Gabriela Women’s Organization nga owa kunta naga-aray makarun ro publiko kung naging maabtik ro gobyerno.
Sa makarun nga tiyempo sigon dapat nga magpatunga ro gobyerno ag himuon ro tanan agud nga makontrol ro sitwasyon.
Ginsuhestiyon pa kara sa gobyerno nga temporaryo anay nga suspendihon ro excise tax ag value added tax kamana man nga uman nga i-review ro oil deregulation law.
Sa makarun suno kana hay haeos kapin sa P200 hasta P300 ro nagbuhin sa ginakita it mga driver.
Samtang batyag man sigon it mga pomoeuyo ro domino effect kara matapos nga nagmahaean ro presyo it mga nagapangunang baeak-eon
Sa pihak nga parte, ginkuwestiyon man ni Francisco ro ginaduso makarun nga pagpatuman it 4 day work week agud nga makatipid sigon ro mga kompanya ag trabahador kasunod sa gihapon it nagatinaas nga presyo it mga produktong petrolyo.
Suno kana nga may mga ahensiya it gobyerno ag establisiyemento nga kinahangean it publiko 24/7 rason nga dapat hay may insakto raya nga empleyado mas kapin sa tiyempo it kalamidad ukon emerhensiya.
