Ginaeauman nga magiging exciting ro game 1 sa best of seven champoinship series it NBA finals sa tunga it Golden State Warriors ag Boston Celtics sa adlaw it Biyernes nga igapatigayon sa Chase Center.
Suno kay Mr. Basil Tabernilla, sangka sports analyst nga magiging hugot ro hampang sa tunga it daywang premyadong koponan bangud nga pareho ro mga raya nga nagahangad it kampeonato.
Haeos 12 anyos nga uwa it apperance sa NBA finals ro Celtics rason nga eauman nga uhaw ro mga raya sa kadaeag-an.
Samtang, ro Warriors hay gusto man it mga raya nga makuhit it uman ro titueo matapos nga makatlong beses eon nga nagkampeon.
Pag-abot suno kay Tabernilla sa mga players hay parehong may ikabuga ro magtimbang nga koponan kon siin ginaekspektar nga inde magpabaya ro Warriors stars nga sanday Draymond Green, Klay Thompson ag Stephen Curry.
Apang, mapagsik man ro dynamic duo nanday Jayson Tatum ag Jaylen Brown nga ginapanan-aw nga magabueoligan para maangkon it Celtics ro tropeyo makaron nga NBA season.
