KALIBO, Aklan—Indi eon kinahangean nga maggastos it mabahoe ro mga turistang gustong magbakasyon sa isla it Boracay bangud nga pagasabton eon sigon it Department of Tourism (DOT) ro gina-required nga COVID-19 testing.
Ginaduso makaron it DOT ro pagpatuman it manabang haega ukon libreng RT-PCR test para sa mga bakasyunistang paagto sa isla.
Sa pueong nga ginpatigayon it Boracay Interagency Task Force ko nagtaliwan nga adlaw it Miyerkules, ginpahayag ni Tourism Secretary Bernadette Romulo-Puyat nga nagapadayun ro andang pakikipag-angot sa University of the Philippines-Philippine General Hospital (UP-PGH) agud nga sabton ro maskin 50 porsiyento it gastos para sa swab test it mga domestic tourists.
Ro pondo hay magahalin sigon sa Tourism Promotion Board.
Nagabalor sigon makaron ro RT-PCR test sa UP-PGH it P1,800 pesos per kit , kun sa siin mas manaba sa ginasukot it ibang testing laboratory centers sa nasyon.
Mag-eowas kara, ginatun-an man it DOT ro posibleng paggamit it rapid antigen tests para sa mga non-Aklanon tourists.
