KALIBO, Aklan—Kumbensido ro beteranong ekonomista ag House Ways and Means Committee chairman Joey Sarte Salceda nga masarangan pa it Pilipinas nga maeampasan ro GDP projection it credit benchmaker nga Moody’s Analytics para sa nasyon.
Una kara, ginpahayag it Moody’s Analytics nga ro GDP growth outlook nanda para sa Pilipinas hay ginpasaka sa 6.2 percent para sa dag-on 2021 halin sa nauna nandang ginaeauman nga 5.6 perceng eamang.
Suno kay Salceda, nagaguwa sa Foreign Direct Investments (FDIs) ko Nobyembre nga ro nasyon hay amat-amat eon nga nakakabalik sa pre-pandemic investment levels kara.
Samtang, posible sigon nga magmayad-ayad pa ro sitwasyon it ekonomiya it nasyon kung mapabilin ro developments ngara kung magguwa eon man ro datos para sa FDI ko Disyembre.
Sa makaron, ginpahayag it kongresista nga nakikipag-angot ro Kamara sa Gabinete sa pagbaeay it transitional Strategic Investment Priorities Plan para maka-avail eon ro nagkaeain-eain nga industriya it tax incentives sa idaeom it CREATE Law.
Maskin nga makabulig man sa ekonomiya ro paggastos para sa eleksyon, owa man raya ginaeauman nga magiging marginal.
Apang apela nana sa Commission on Elections nga ilibre eon sa election spending ban ro social welfare ag aid programs para madasig nga makahaw-as sa epekto it pandemya makaron nga dag-on ro mga apektadong pamilya.
